Hoxe, martes 2 de abril, presentouse ás 13:30 horas no Salón de plenos do
Concello de Palas de Rei o XII FESTIVAL
GALEGO DE TEATRO ESCOLAR DE PALAS DE REI que se celebrará o sábado 6 de
abril no Salón de actos da Casa de Cultura de Palas de Rei e no Castelo de
Pambre. Este evento está organizado polo Obradoiro Municipal de Teatro en
colaboración co Concello de Palas, a Asociación Cultural A Fonte de Merlán, o
Grupo de música e baile tradicional Palacio do Rei, a Coral Polifónica de
Palas, Alentía Teatro e Metátese Teatro. Na presentación interviron o Alcalde
desta vila, Pablo Taboada Camoira, un representante de Metátese, Andrés Vázquez
e a presidenta de Alentía Teatro, Gema Buján Mosteiro.
Participarán nesta
xornada cultural máis de douscentos actores e actrices de cinco Aulas de Teatro
de diferentes puntos xeográficos de Galicia (Laxe, Compostela, Palas de Rei,
Touro e A Estrada).
O programa deste
Festival é o seguinte:
Haberá un roteiro teatral, musical e poético ás 11:00
horas dentro do Castelo de Pambre que estará protagonizado pola Coral Polifónica de
Palas de Rei, as Asociacións culturais A fonte de Merlán e Palacio do Rei, polo
alumnado do Obradoiro Municipal de Teatro e por actores e actrices de Alentía
Teatro e Metátese Teatro.
Este
roteiro combinará música, teatro, poesía e xogo e persegue varios obxectivos: achegar diferentes
xéneros teatrais á poboación, a interrelación entre persoas de diferentes
idades e localidades, o achegamento do alumnado ao mundo rural e á cultura
tradicional e a posta en valor do patrimonio cultural que posúe o Concello de
Palas
Ás 13:00 horas, na Casa de Cultura de Palas de Rei, O Obradoiro
Municipal de Teatro de Palas de Rei, A Escola Municipal de Teatro de Palas, A
Aula de Teatro do CPI de Touro, A Aula de Teatro do IES Antón Losada Diéguez da
Estrada, “Avelaíñas Teatro” e A Aula de Teatro do IES Antonio Fraguas Fraguas
porán en escena o espectáculo VOGANDO
NOS CONTOS.
Trátase dun espectáculo
de creación colectiva que se vertebra sobre un concepto da educación como
ferramenta imprescindible na realización
plena do ser humano a través de valores como o diálogo, a tolerancia, a paz, a
humildade, o respecto… Este traballo de máis douscentos actores e actrices
amosa, tamén, o valor da lectura como elemento esencial na formación de persoas
equilibradas emocionalmente, autónomas e libres; pon de manifesto a relevancia
da empatía con aqueles que sofren para habitar na auténtica esencia do ser
humano; reivindica o valor do desenvolvemento de proxectos educativo
colectivos…
Vogando nos
contos supón, ademais, unha viaxe ao universo da imaxinación, da diversión
e do xogo para abrir unha fiestra á fantasía e desfrutar da maxia da
creatividade que ilumina un camiño de marabillas que nos permite poñer ás e
voar. Actrices e actores sobre un escenario onde habita unha utopía que,
paseniñamente, se transforma en realidade, grazas ao traballo cooperativo de
todo o grupo e que alimenta as raíces e os anceios de compartir a certeza de
que a liberdade só é posible cando nos atrevemos a soñar un mundo máis xusto e
libre. Máis feliz. Máis humano. Trátase, pois, dun espectáculo que pretende
alentar o desfrute dos sentidos convertíndoos en ferramenta subversiva que
contribúa a cambiar o mundo. Voa, se queres. Constrúe o teu paraíso. Nós
imaxinamos o noso. Un mundo que baila, que soña, que vibra… todo PARA TI!
Arriba o pano!
Este Festival permite que o alumnado
das cinco aulas de teatro interactúe e propicia que amose o traballo realizado
durante o Curso teatral que se desenvolveu ao longo do curso académico 2018/19
nas cinco localidades; ademais de integrar a persoas con diferentes
capacidades, de intercambiar experiencias e traballar conxuntamente nun
obxectivo común: a posta en escena dunha obra teatral . Insírese dentro dunha
xira de funcións que comezou o día 8 de febreiro no Teatro Principal de Ourense,
continou en Touro, o 31 de marzo, e seguirá en Compostela, A Estrada, Laxe,
Bologna, Florencia e Pisa.
BRINCAS, CAMIÑAS E SORRÍS DENTRO DE NÓS GABRIEL !!!
