VI PREMIO GARABATO: SEMENTE LUGO, ESCOLA DE ENSINO GALEGO

 VI PREMIO GARABATO : SEMENTE LUGO

VI PREMIO “GARABATO” EN HOMENAXE A GABRIEL BARREIRO TOURAL

As Asociacións Culturais ALENTÍA e METÁTESE TEATRO e A ORDE DAS DONAS E

CABALEIROS DO PRIORATO DE VILAR DAS DONAS “OS LOBOS” estableceron este premio

GARABATO á conservación do noso patrimonio, herdado da Terra e dos nosos devanceiros e

determinaron concedelo a aquelas persoas e organizacións ou asociacións que estimen

teñen luz para manter e coidar, para mimar, gardar e defender o devandito patrimonio,

tanto natural como cultural, na honra e lembranza de Gabriel Barreiro Toural, el foi técnico

de luz e son de Metátese Teatro; e dotalo con 1000 euros.

Foi decisión do xurado conceder este VI PREMIO “GARABATO” EN HOMENAXE A GABRIEL

BARREIRO TOURAL, a SEMENTE LUGO – Escola de Ensino Galego.

Entre os argumentos empregados polo xurado destacan:

1.- O traballo decidido a prol da adquisición, conservación, coidado e consolidación da

lingua galega no alumnado.

2.- Favorecer e crear espazos pedagóxicos que propician:

 A educación integral do alumnado.

 A coeducación.

 A interacción coa natureza.

 Integración do contexto no lugar.

Cómpre dicir que o proxecto da Semente Lugo forma parte da rede das Escolas de Ensino

Galego Semente, unha iniciativa social sen ánimo de lucro, da cal tamén forman parte as

Sementes de Compostela, Vigo, Trasancos e Coruña.

Segundo na súa páxina web reza, “Entendemos o idioma galego como parte indisolúbel da

nosa cultura, da nosa historia e do noso futuro, e defendemos o seu carácter internacional;

criando un espazo de interculturalidade fomentarase a importancia do respecto a outras

culturas que viven no noso país.

As Escolas de Ensino Galego son un espazo cunha pedagoxía transformadora, activa e

inserida no medio natural, social e cultural propio do ámbito rural lucense.”

A educación experimentando e interactuando co medio natural que sempre nos

acompañou, a lingua propia que nel xurdiu, a igualdade de xénero total, a liberdade

responsable, o respecto a outras culturas coas que cohabitamos, o contexto e realidade da

veciñanza, o amor e dignificación do que somos... entre outros, como se dixo, son sinais de

identidade de SEMENTE LUGO Escola de Ensino Galego.

A sociedade actual parece levarnos camiño do que non somos; pretende igualar, borrar o

diferente, a adhesión incondicional; que queiramos ser o que non somos, así teremos máis

prestixio e seremos singulares, únicos, senlleiros; a gran contradición que nos engana. Mais,

a diferenza cultural entraña riqueza, a uniformidade desaparición e frustración. Seremos

outra cousa, non nós. Nesta sociedade na que a educación non fomenta a crítica e o criterio

persoal, onde intereses individuais e capitalistas nos anegan, centros educativos coma este

son luz e vida.

Grazas polo voso labor. Grazas por nos honrardes coa vosa presenza, nesta terra viva e

aberta, no noso niño montesío e de valgadas, de auga e herbas, de árbores e animais que

nos alentan, e de lingua e fala que nos identifica e comunica. Esa lingua que coma zume

mana da terra e sobe corpo arriba e éncheo do espazo propio no que as nenas e nenos

veñen á vida, medran e se crían. Elas e eles son a semente na que agroma o que nos agarda,

de seguirmos sendo nós, con respecto e amor, Galiza. Grazas polo voso labor.

Entrega o premio a nai de Gabriel, María… Toural….

BRINCAS, CAMIÑAS E SORRÍS DENTRO DE NÓS GABRIEL !!!